Afkoma Arion banka á fyrri helmingi ársins 2014
Hagnaður Arion banka á fyrri helmingi ársins 2014 nam 17,4 milljörðum króna eftir skatta samanborið við 5,9 milljarða króna á sama tímabili 2013. Arðsemi eigin fjár var 23,4% samanborið við 8,9% á sama tímabili árið 2013. Heildareignir námu 949,0 milljörðum króna samanborið við 938,9 milljarða króna í árslok 2013.
Eiginfjárhlutfall bankans í lok tímabilsins var 25,6% en var 23,6% í árslok 2013.
Helstu atriði árshlutareikningsins:
- Hagnaður eftir skatta nam 17,4 mö.kr. samanborið við 5,9 ma.kr. á sama tímabili 2013.
- Hagnaður á öðrum ársfjórðungi nam 14,5 mö.kr. samanborið við 4,5 ma.kr. á öðrum ársfjórðungi 2013.
- Rekstrartekjur hækka á milli ára og námu 25,7 mö.kr. samanborið við 20,7 ma.kr. á sama tímabili árið 2013. Hækkun hefur átt sér stað í öllum þáttum rekstrarins nema í hreinum vaxtatekjum, mesta hækkunin er í hreinum fjármunatekjum.
- Hreinar vaxtatekjur námu 12,0 mö.kr. samanborið við 12,7 ma.kr. á sama tímabili 2013.
- Hreinar þóknanatekjur námu 6,6 mö.kr. samanborið við 5,3 ma.kr. á sama tímabili 2013. Aukningin er einkum tilkomin vegna hærri þóknanatekna af greiðslukortum og af starfsemi fjárfestingarbankasviðs.
- Tekju- og bankaskattar námu samtals 3,8 mö.kr. samanborið við 1,9 ma.kr. á sama tímabili 2013.
- Hagnaður af aflagðri starfsemi nam 6,5 mö.kr. samanborið við 65 m.kr. tap á sama tíma 2013. Hagnaðurinn er nær eingöngu tilkominn vegna sölu á 18,8% eignarhlut bankans í HB Granda hf.
- Rekstrarkostnaður nam 13,0 mö.kr. samanborið við 12,9 ma.kr. á sama tímabili 2013.
- Hrein virðisbreyting er jákvæð á tímabilinu og nemur 2,0 mö.kr. samanborið við 134 m.kr. tekjufærslu á sama tímabili 2013. Virðisaukning útlána til fyrirtækja nemur 2,3 mö.kr. á fyrri helmingi ársins en niðurfærsla útlána til einstaklinga nemur 0,9 mö.kr. Virðisaukning annarra eigna nemur 0,7 mö.kr. á tímabilinu.
- Arðsemi eigin fjár var 23,4% en var 8,9% á sama tímabili 2013.
- Vaxtamunur af meðalstöðu vaxtaberandi eigna var 2,8% en var 3,1% á sama tíma árið 2013.
- Kostnaðarhlutfall var 50,5% en var 62,4% á sama tímabili 2013.
- Heildareignir námu 949,0 mö.kr., samanborið við 938,9 ma.kr. í árslok 2013.
- Eigið fé bankans var 154,5 ma.kr. en nam 144,9 mö.kr. í lok árs 2013. Bankinn greiddi arð til hluthafa sinna á tímabilinu upp á 7,8 ma.kr.
- Eigninfjárhlutfall nam 25,6% í lok tímabilsins samanborið við 23,6% í árslok 2013.
Höskuldur H. Ólafsson, bankastjóri Arion banka:
„Afkoma bankans á fyrstu sex mánuðum ársins er mjög góð og í takt við okkar væntingar. Grunnrekstur bankans einkennist áfram af stöðugleika og fjárhagslegur styrkur bankans heldur áfram að vaxa. Á undanförnum misserum höfum við unnið að því að auka vægi þóknanatekna í heildartekjum bankans og er ánægjulegt að sjá árangur af þeirri vinnu í þessu uppgjöri. Sala bankans á hlutum í HB Granda hf. setur mark sitt á uppgjörið með jákvæðum hætti. Salan á HB Granda og skráning fyrirtækisins á Aðallista Kauphallarinnar var mikilvægur áfangi fyrir okkur, en einnig var mikilvægt fyrir hlutabréfamarkaðinn á Íslandi að öflugt sjávarútvegsfyrirtæki væri skráð á Aðallista Kauphallarinnar. Góð afkoma á tímabilinu styrkir enn frekar eiginfjárhlutfall bankans sem er nú 25,6% sem er vel yfir þeim kröfum sem gerðar eru til bankans. Þá greiddi bankinn eigendum sínum arð á tímabilinu.
Það er sérstakt ánægjuefni að hafa komið að tveimur stórum fjárfestingarverkefnum hér á landi undanfarna mánuði. Um er að ræða verkefni á vegum United Silicon annars vegar og Silicor Materials hins vegar. United Silicon er komið í framkvæmdafasa en Silicor er enn í þróun. Hvort tveggja mjög spennandi verkefni sem auka fjölbreytni í íslensku atvinnulífi. Þeim fylgja fjöldi nýrra starfa og auknar gjaldeyristekjur til framtíðar. Þessi verkefni kalla á mikla fjárfestingu hér á landi en það hefur háð íslensku efnahagslífi undanfarin ár að fjárfesting hefur verið í sögulegu lágmarki. Það er því ánægjulegt að Arion banki geti með styrk sínum stuðlað að brautargengi þessara verkefna.“
Afkomutilkynning Arion banka 1H 2014