Teymin sem taka þátt í Startup Reykjavík 2016

Startup Reykjavík viðskiptahraðallinn fer fram í fimmta skipti í sumar. Um 250 teymi sóttu um að taka þátt og hafa 10 teymi verið valin. Tilkynnt var hvaða teymi taka þátt í sumar á hinni árlegu ráðstefnu Startup Iceland sem haldin var í Hörpunni þann 30. maí. Það er Arion banki sem stendur að Startup Reykjavík í samstarfi við Icelandic Startups.

Teymin tíu eru eftirfarandi:

Platome

Framleiðir næringu fyrir stofnfrumur til að flýta fyrir þróun á stofnfrumumeðferðum.

Convex

Litríkur og fjölskylduvænn ævintýraleikur.

Strivo

Veitir þjálfurum/einkaþjálfurum tækifæri til að selja þjónustu sína á nýju og áhugaverðu sniði.

Lava Show

Mögnuð sýning þar sem alvöru bráðið hraun rennur inn í sýningarsal og yfir ís með tilheyrandi sjónarspili.

Hringborð

App sem er vettvangur fyrir stúdenta til að deila glósum og námsefni sín á milli.

Isold Film

Lána- og fjárfestingarsjóður fyrir kvikmynda og sjónvarpsgerð.

Drexler

Tónlistardrifinn fjölnotendahlutverkatölvuleikur.

FLOW

Býður upp á aðgengilegt efni tengt hugleiðslu og vellíðan.

TotalHost

Gerir Airbnb leigusölum kleift að fá greidda söluþóknun fyrir bókaðar ferðir innanlands.

Moon Chocolate

Framleiðir hágæða súkkulaði sem er búið til frá grunni.

Með þátttöku í Startup Reykjavík fá félögin aðstöðu í 10 vikur sem þau deila með hinum teymunum sem þátt taka. Einnig njóta þau leiðsagnar fjölda reyndra mentora sem deila sinni þekkingu og reynslu. Að auki þá fjárfestir Arion banki í félögunum sem taka þátt í Startup Reykjavík fyrir 2,4 milljónir króna gegn 6% eignarhlut.

Startup Reykjavík fór fyrst fram árið 2012 og hafa árlega 10 félög tekið þátt og þróað sínar viðskiptahugmyndir. Startup Reykjavík var valinn besti viðskipahraðall Norðurlanda árið 2015 og besti viðskiptahraðallinn á Íslandi árin 2015 og 2016. Alls hafa 40 félög farið í gegnum Startup Reykjavík viðskiptahraðalinn.