Arion banki bakhjarl Ferðafélags Íslands

Arion banki verður aðalsamstarfsaðili og bakhjarl Ferðafélags Íslands (FÍ) næstu þrjú árin. Þetta kemur fram í samstarfssamningi bankans og FÍ sem undirritaður var á dögunum.

Arion banki mun leggja Ferðafélagi Íslands lið til góðra verka á fjöllum, m.a. til uppbyggingar göngustíga og fjallaskála, almenningi og ferðafólki til heilla. Þá mun bankinn einnig styðja við eflingu öryggismála á fjöllum, náttúruvernd og fleiri samfélagslegra verkefna Ferðafélagsins.

Í samtali við Morgunblaðið sagði Páll Eysteinn Guðmundsson, framkvæmdastjóri Ferðafélags Íslands:

„Okkur er mikið ánægjuefni að fá þennan góða bakhjarl. Við höfum á síðustu árum staðið fyrir uppbyggingu víða, svo sem á Laugaveginum þar sem framkvæmt hefur verið fyrir háar upphæðir. Þá er félagið öflugt í ýmsum lýðheilsuverkefnum; það er að fá fólk til að hreyfa sig sem gerir öllum gott. Liðsinni Arion banka í þessu er kærkomið og mikilvægt. “