Útboð og skráning Símans í október
- Arion banki býður 18-21% hlut í almennu útboði 5.-7. október
- Stærð útboðsins nemur að lágmarki 4,7 milljörðum króna miðað við lágmarksgengi 2,7 krónur á hlut
- Síminn væntir þess að viðskipti með hlutabréf félagsins geti hafist á Aðalmarkaði Nasdaq Iceland 15. október
Stjórn Símans hf. hefur ákveðið að óska eftir því við Nasdaq Iceland að hlutabréf félagsins verði tekin til viðskipta á Aðalmarkaði. Síminn væntir þess að viðskipti geti hafist 15. október næstkomandi.
Arion banki býður 18-21% til sölu í almennu útboði
Áður en kemur að skráningu Símans mun fara fram almennt útboð á hlutabréfum í félaginu dagana 5.-7. október þar sem Arion banki hf. býður til sölu 18-21% eignarhlut í félaginu. Miðað við lágmarksverð útboðsins nemur heildarstærð þess 4,7-5,5 milljörðum króna og svarar það til um 26 milljarða króna markaðsvirðis alls hlutafjár í Símanum.
Tvær tilboðsbækur verða í boði fyrir fjárfesta. Í tilboðsbók A verður fjárfestum boðið að skrá sig fyrir kaupum að andvirði á bilinu frá 100 þúsund krónum og upp í 10 milljónir króna. Þar verður tekið við áskriftum á verðbilinu 2,7-3,1 króna á hlut en eitt endanlegt útboðsgengi í tilboðsbók A verður ákvarðað af seljanda í lok útboðs. Í tilboðsbók B verður tekið við áskriftum að andvirði yfir 10 milljónum króna. Þar verður lágmarksverð 2,7 krónur á hlut og ekkert hámarksverð tilgreint af seljanda en eitt endanlegt útboðsgengi í tilboðsbók B verður ákvarðað af seljanda í lok útboðs sem verður jafnt eða hærra útboðsgengi í tilboðsbók A.
Orri Hauksson, forstjóri Símans:
„Síminn er með traustar rætur í íslensku samfélagi og sterka stöðu á þeim mörkuðum sem fyrirtækið starfar á. Skráning félagsins í kauphöll er mikilvægt skref fyrir félagið, starfsfólk og hluthafa. Við teljum að félagið sé vel í stakk búið til skráningar og undirbúið fyrir þær áskoranir og aðhald sem skráningu fylgir.”
Höskuldur H. Ólafsson, bankastjóri Arion banka:
„Arion banki hefur lagt ríka áherslu á uppbyggingu hlutabréfamarkaðarins hér á landi með því að stuðla að skráningu nýrra félaga í kauphöllina. Það er því ánægjulegt að á fjórum árum hefur Arion banki haft umsjón með skráningu sjö félaga. Síminn er þriðja félagið sem við fleytum á markað í ár með almennu útboði í aðdraganda skráningar. Það hefur verið ánægjulegt að vinna með Símanum að undirbúningi þessara tímamóta, því þarna er á ferðinni mikilvægt og öflugt félag á sviði fjarskipta og tækni, með mikla sögu og sterkt vörumerki. Síminn verður góð viðbót við íslenska hlutabréfamarkaðinn.“
Um Símann
Síminn er stærsta fjarskiptafyrirtæki á Íslandi og starfar einkum á sviði fjarskipta, fjölmiðlunar og upplýsingatækni. Síminn er í senn rekstrarfélag á sviði fjarskipta og tengdrar starfsemi og eigandi 6 dótturfélaga; Mílu, Sensa, Staka, On-Waves, Talenta og Radíómiðunar. Síminn býður viðskiptavinum sínum heildstætt vöruframboð á sviði fjarskipta og tengdra geira eins og fjölmiðlunar og upplýsingatækni, hvort sem um einstaklinga eða fyrirtæki er að ræða. Eftirfarandi þjónustuþættir eru í vöruframboði Símans: Farsímaþjónusta, talsímaþjónusta, gagnaflutnings¬þjónusta, internetþjónusta, sjónvarpsþjónusta, sjónvarps- og útvarpsdagskrá ásamt sölu auglýsinga í þeim miðlum, svo og hýsingar- og rekstrarþjónusta í upplýsingatækni.
Upplýsingar um félagið - 1. október 2015
Síminn hefur birt lýsingu dagsetta 25. september 2015 þar sem nálgast má helstu upplýsingar um félagið, hlutabréf þess og fyrirhugað útboð, ásamt viðauka dagsettan 1. október 2015. Jafnframt hefur félagið birt fjárfestum kynningu á starfsemi sinni og útboðinu. Skjölin eru aðgengileg á vef félagsins (www.siminn.is/siminn/fjarfestar).
Skráningarlýsing Símans
Viðauki við skráningarlýsingu Símans
Fjárfestakynning Símans