Upplýsingar um viðskiptavini uppfærðar

Starfsfólk Arion banka vinnur nú að því að uppfæra grunnupplýsingar, s.s. heimilisfang, netfang og símanúmer, viðskiptavina bankans. Þetta er gert í kjölfar nýlegra lagabreytinga þar sem gerðar eru auknar kröfur til fjármálafyrirtækja varðandi þekkingu þeirra á viðskiptavinum sínum. Uppfærslur sem þessar verða framvegis gerðar með reglubundnum hætti.

Leitast er við að gera þetta ferli sem þægilegast fyrir viðskiptavini bankans og geta viðskiptavinir sjálfir uppfært sínar upplýsingar í netbankanum eða Arion appinu. Viðskiptavinir geta einnig litið við í næsta útibúi bankans þar sem starfsfólk tekur við uppfærðum upplýsingum.

Markmiðið með áðurnefndum lagabreytingum er að verja bæði fjármálastofnanir og viðskiptavini þeirra fyrir peningaþvætti, fjármögnun hryðjuverka, auðkennisþjófnaði og annars konar sviksemi.