Almennt hlutafjárútboð í Eik fasteignafélagi

Stjórn Eikar fasteignafélags hefur ákveðið að óska eftir að hlutabréf félagsins verði skráð á Aðalmarkað Nasdaq Iceland. Í aðdraganda skráningarinnar mun fyrirtækjaráðgjöf Arion banka hafa umsjón með almennu útboði á hlutum í Eik fasteignafélagi hf. Stefnt er að því að útboðið verði haldið dagana 17. - 20. apríl 2015. Í útboðinu hyggst Arion banki hf. bjóða til sölu allt að 14% eignarhlut sinn í félaginu en frekari upplýsingar um stærð og fyrirkomulag útboðsins verða birtar í lýsingu félagsins. Með fyrirvara um staðfestingu Fjármálaeftirlitsins á lýsingu Eikar fasteignafélags verður hún birt á vefsvæði félagsins, www.eik.is/fjarfestar, í aðdraganda útboðsins.

Eik fasteignafélag sinnir rekstri og útleigu á atvinnuhúsnæði. Fjöldi eigna félagsins er yfir 100 og telja þær samtals um 273 þúsund fermetra. Virði fjárfestingaeigna félagsins er um 62 ma.kr. og heildarfjöldi leigutaka er yfir 400. Helstu eignir Eikar eru Borgartún 21 og 26, Nýi Glæsibær, Turninn í Kópavogi, Smáratorg og Austurstræti 5, 6, 7 og 17. Stærstu leigutakar eru Fasteignir ríkissjóðs, Húsasmiðjan, Landsbankinn, Rúmfatalagerinn, Skipti, Deloitte og VÍS.