10 fyrirtæki valin til þátttöku í viðskiptahraðlinum Startup Reykjavik 2015

Viðskiptahraðallinn Startup Reykjavík sem nýverið var valinn besti viðskiptahraðall Norðurlandanna fer fram í fjórða sinn nú í sumar á vegum Arion banka og Klak Innovit. Alls bárust um 150 umsóknir og hafa tíu teymi verið valin til þátttöku.

“Fyrirtækin sem valin hafa verið til þátttöku í ár eru með mikla breidd í starfsemi og teymin eru sterk. Framkvæmd viðskiptahugmynda veltur mest á því fólki sem við hana starfar og við hlökkum til að vinna með fyrirtækjunum í sumar og í framhaldinu. Að Startup Reykjavík hafi verið valinn Viðskiptahraðall ársins á Norðurlöndunum nýlega setur svo jákvæðan þrýsting á okkur að halda áfram að efla frumkvöðlaumhverfið á Íslandi.” 

- Einar Gunnar Guðmundsson, forsvarsmaður Arion banka í nýsköpun.

Verkefnin sem valin hafa verið til þátttöku í Startup Reykjavík nú í sumar:

• Wasabi Iceland - Ætla að rækta hágæða wasabi á Íslandi með því að nýta hreint vatn og endurnýjanlega orku
   
• Kvasir software - Munu nútímavæða borðspil þar sem síminn þinn er stjórntækið og sjónvarpið borðspilið
   
• Farma - Tengir saman rafræn skilríki og rafræna lyfseðla. Fólk getur keypt lyf á netinu með öruggum hætti og fengið sent heim
   
• Viking Cars - Vettvangur til þess að deila bílnum sínum með öðrum með öruggum hætti - þetta er eins og Airbnb fyrir bíla
   
• Spor í sandinn - Munu byggja sjálfbært vistkerfi í hjarta borgarinnar sem býður upp á nýja upplifun í ferðaþjónustu
   
• Genki instruments – Eru að þróa nýstárleg raftónlistarhljóðfæri sem tengja má saman með áður óséðum hætti
   
• Three42 - Hugbúnaður sem tekur við upplýsingum úr bílnum þínum og tengir beint við snjallsímann
   
• Delphi - Nýta þekkingu fjöldans til þess að spá fyrir um tiltekna viðburði í framtíðinni
   
• PuppIT - Þróa tækni til að taka upp myndefni í rauntíma til þess að nýta fyrir kvikmyndir, leiki, leikhús og sýndarveruleika
   
• Hún / Hann Brugghús - Stefna að því að búa til hágæða bjór úr íslenskum hráefnum

Teymunum tíu sem valin hafa verið til þátttöku verður lagt eftirfarandi til: 

• 2 milljónir í hlutafé frá Arion banka gegn 6% hlutdeild í fyrirtækinu
• 10 vikna þjálfun/ráðgjöf frá mentorum víðs vegar að úr atvinnulífinu 
• Sameiginleg aðstaða allra viðskiptateymanna
• Tækifæri til að kynna sig og verkefni sín fyrir fjárfestum á lokadegi verkefnisins

Á síðustu þremur árum hafa þrjátíu teymi tekið þátt í Startup Reykjavík og hefur Arion banki fjárfest í þeim öllum auk þess að fjármagna vinnusmiðjur og aðstöðu teymanna. Framkvæmd verkefnisins er í höndum Klak Innovit.