Hagræðingaraðgerðir hjá Arion banka

Arion banki hefur á undanförnum árum lagt mikla áherslu á hagræðingu í rekstri bankans. Mikilvægt er að bæta afkomu reglulegrar starfsemi, meðal annars með því að draga úr kostnaði og styrkja þannig samkeppnishæfni bankans til framtíðar.

Í hagræðingarskyni hefur Arion banki á undanförnum árum meðal annars lokað 16 útibúum og afgreiðslum víðsvegar um landið og hefur starfsfólki bankans fækkað um 120 frá árslokum 2009 þrátt fyrir að starfsemi Verdis, Sparisjóðs Ólafsfjarðar og Dróma hafi færst til bankans. Hefur fækkun starfsfólks náðst fram að miklu leyti í gegnum hefðbundna starfsmannaveltu með þeim hætti að ekki hefur verið ráðið aftur í störf sem losna. 

Í dag var ráðist í frekari hagræðingaraðgerðir innan Arion banka þegar 18 starfsmönnum var sagt upp störfum. Það er erfitt skref að þurfa að grípa til uppsagna en nauðsynlegt til að auka skilvirkni og hagkvæmni í grunnrekstri bankans. Að auki verður afgreiðslu Arion banka á Hólmavík lokað en við það munu tveir starfsmenn til viðbótar láta af störfum.

Eftir lokun afgreiðslunnar á Hólmavík starfrækir Arion banki 23 útibú og afgreiðslur um land allt. Viðskiptavinir afgreiðslunnar á Hólmavík geta sótt þjónustu í útibú bankans í Borgarnesi eða hvert það útibú bankans sem þeir kjósa, en um helmingur viðskiptavina afgreiðslunnar á Hólmavík er með búsetu á höfuðborgarsvæðinu.