Arion banki og DNB Bank fjármagna kaup HB Granda á uppsjávarskipum

HB Grandi hefur samið við Arion banka og DNB Bank um fjármögnun á smíði tveggja uppsjávarskipa sem áætlað er að verði afhent á árinu 2015, en HB Grandi gerði nýverið samning við tyrknesku skipasmíðastöðina Celiktrans Deniz Insaat Ltd. um smíði skipanna. Nýju skipin munu lækka meðalaldur skipaflota HB Granda úr 33 árum í 23.

Samningarnir taka til langtíma fjármögnunar skipanna og endurfjármögnunar á eldri langtímalánum HB Granda. Lánveitingin nú nemur 77 milljónum evra eða um 11,5 milljörðum króna. 

Þetta er í fyrsta skipti sem Arion banki og DNB Bank vinna saman að fjármögnun fjárfestinga í íslenskum sjávarútvegi, en samvinna bankanna í þessu verkefni leiðir til lækkunar á vaxtakjörum HB Granda.