Frábær stemning á Arion banka mótinu um síðustu helgi

Mikill fjöldi fólks var saman kominn í félagssvæði Víkings í Fossvogi um síðustu helgi á Arion banka mótinu í fótbolta. Metþátttaka var á mótinu en um 2.500 þátttakendur í 410 liðum tóku þátt í keppninni í ár.

Frábær stemning var í Víkinni og heppnaðist mótið afar vel. Boðið var upp á andlitsmálningu og Bíbí, Blaki og Ari voru að sjálfsögðu á staðnum og sáu um að skemmta krökkunum.

Arion banka mótið er fyrir börn í 7. og 8. flokk stúlkna og drengja og er stærsta mótið þar sem bæði kynin spila á sama tíma. Er þetta í sjöunda sinn sem mótið er haldið og hefur fjöldi þátttakenda farið vaxandi ár frá ári.

Skemmtilegar myndir frá mótinu má sjá hér og liðsmyndir er hægt að nálgast hér. Allar liðsmyndir frá laugardeginum eru komnar inn og liðsmyndir frá sunnudeginum verða komnar inn í síðasta lagi fimmtudaginn 18. ágúst.