Besta íslenska nemendafyrirtækið verður valið 27. apríl

Lokaumferðin í samkeppni Ungra frumkvöðla, Junior Achievement á Íslandi, um nemendafyrirtæki ársins fer fram í höfuðstöðvum Arion banka, Borgartúni 19, miðvikudaginn 27. apríl. Dómnefnd hefur þegar valið 15 fyrirtæki af þeim 60 sem nemendur hafa stofnað í fyrirtækjasmiðju Ungra frumkvöðla á árinu 2016 og tilkynnt verður næstkomandi miðvikudag, að lokinni keppni, hvaða fyrirtæki verður fyrir valinu sem Nemendafyrirtæki ársins. Arion banki er einn af aðalbakhjörlum Ungra frumkvöðla.

Með fyrirtækjasmiðju Ungra frumkvöðla er frumkvöðlastarf kynnt fyrir framhaldsskólanemum með það að markmiði að efla frumkvöðlaanda meðal ungmenna og þjálfa frumkvöðla framtíðarinnar. Árið 2016 tóku á fjórða hundrað nemenda í átta framhaldsskólum þátt og er útlit fyrir að fjöldinn verði enn meiri á næstu árum. Markmiðið er að gefa meirihluta íslenskra nemenda færi á að kynnast frumkvöðlastarfi af eigin raun í námi sínu.

Samtökin Ungir frumkvöðlar efla íslenska nýsköpunarmenningu með átaki sínu í menntaskólum og bætast þar með við þau átaksverkefni sem fyrir eru á háskólastigi (Startup Reykjavík, Startup Energy Reykjavík) og á grunnskólastigi (Nýsköpunarkeppni grunnskólanema). Öllu þessu starfi er ætlað að hvetja unga fólkið til þess að tileinka sér nýsköpun í starfi sínu, en margt stendur enn í vegi fyrir evrópskum frumkvöðlum, svo sem aðgangur að áhættufjármagni og regluverk.