Fjárfestatengsl

Jákvæð þróun í kjarnastarfsemi

Hagnaður samstæðu Arion banka á fjórða ársfjórðungi 2018 nam 1,6 milljarði króna samanborið við 4,1 milljarðs króna hagnað á sama tímabili 2017. Arðsemi eigin fjár var 3,2% á fjórða ársfjórðungi 2018 samanborið við 7,3% á sama tímabili árið 2017. Hagnaður samstæðunnar á árinu 2018 nam 7,8 milljörðum króna og arðsemi var 3,7% samanborið við 14,4 milljarða króna hagnað og 6,6% arðsemi á árinu 2017. Stjórn bankans leggur til að 10 milljarða króna arður verði greiddur eða sem samsvarar 5 krónum á hlut. Arðgreiðslan er liður í áframhaldandi hagræðingu á samsetningu eigin fjár bankans.

Heildareignir námu 1.164,3 milljörðum króna í árslok 2018 samanborið við 1.147,8 milljarða króna í árslok 2017 og eigið fé hluthafa bankans nam 200,9 milljörðum króna, samanborið við 225,7 milljarða króna í árslok 2017. Arion banki greiddi 16,2 milljarða króna í arð og keypti eigin bréf fyrir 17,1 milljarð króna.

Eiginfjárhlutfall bankans var 22,0% í árslok 2018 en var 24,0% í árslok 2017. Hlutfall almenns eiginfjárþáttar 1 nam 21,2% í árslok, samanborið við 23.6% í árslok 2017.

Höskuldur H. Ólafsson, bankastjóri Arion banka:

„Afkoma Arion banka á fjórða ársfjórðungi var undir væntingum og sama má segja um árið í heild. Við sjáum hins vegar jákvæða þróun í grunnstarfsemi bankans og það er ánægjulegt að sjá að vaxtamunur hækkar á fjórða ársfjórðungi í samræmi við markmið okkar. Erfiðar aðstæður á hluta- og skuldabréfamörkuðum og ekki síst hræringar í flugrekstri settu mark sitt á starfsemina, bæði á fjórðungnum og á árinu í heild. Eitt helsta verkefni þessa árs verður að auka arðsemi í rekstri bankans og hafa ýmis verkefni verðið sett í gang með það að markmiði. Það er engu síður ljóst að það er erfitt verkefni að ná viðunandi arðsemi án umtalsverðra hækkana á útlánavöxtum þegar ríkisvaldið viðheldur ofursköttum á bankakerfið og eftirlitsaðilar bæta við eiginfjárkröfum og öðrum álögum.

Í nóvember var tilkynnt um samning bankans við Citi um ráðgjöf vegna fyrirhugaðra breytinga á eignarhaldi Valitor, dótturfélagi bankans, sem gætu falið í sér sölu á meirihluta hlutafjár eða öllu hlutafé í Valitor. Unnið er að undirbúningi söluferlisins og vænta má frekari tíðinda á þessu ári.

Arion banki var í árslok valinn markaðsfyrirtæki ársins 2018 af Ímark fyrir þá árangursríku stafrænu vegferð sem bankinn hefur verið á. Í raun er svo komið að stafrænu lausnirnar okkar vekja athygli út fyrir landsteinana en bankinn fékk tvenn alþjóðleg verðlaun fyrir þær í desember. Við höfum nú á rúmum tveimur árum kynnt um 20 nýjar stafrænar lausnir og hefur útibúanet bankans tekið breytingum í takt við vinsældir þessara nýju lausna. Á fjórðungnum opnuðum við tvær nýjar afgreiðslur sem taka mið af stafrænni þjónustu og nýta mun minna húsnæði en eldri útbú, alls fækkaði fermetrum sem útibúin okkar á höfuðborgarsvæðinu nýta um tæp 40% á árinu. Það gefur augaleið að þessi þróun hefur áhrif á hvernig við vinnum, hefur aukið skilvirkni í okkar störfum og þjónustu, en ekki síður hefur hún áhrif á hvernig viðskiptavinir sækja sér fjármálaþjónustu. Í dag gera þeir það í 97% tilfella í gegnum stafrænar leiðir, eins og appið, netbankann og vef bankans og jókst stafræn sala um 125% ár árinu.“

Fundur með markaðsaðilum

Haldinn verður fundur fyrir markaðsaðila þann 14. febrúar klukkan 8:30 þar sem Höskuldur H. Ólafsson, bankastjóri, og Stefán Pétursson, fjármálastjóri, munu kynna afkomu bankans og svara spurningum þátttakenda. Fundurinn fer fram á ensku í höfuðstöðvum Arion banka, Borgartúni 19 og verður jafnframt streymt beint.
Þeir sem hyggjast sækja fundinn eru vinsamlegast beðnir um að skrá sig hér. Þeir sem vilja hringja inn á fundinn og taka þátt með því að leggja fram spurningar þurfa að hringja inn áður en kynningin hefst.

Ísland: 800 7415 (PIN: 90959272#)
Svíþjóð: +46 850 558 354
Bretland: +44 333 300 9260
Bandaríkin: +1 646 722 4902

Hægt verður að nálgast streymið beint á financialhearings.com og á fjárfestatengslavef bankans.

Afkomutilkynning Arion banka 4F 2018
Arion banki - ársreikningur samstæðu 2018
Afkomukynning Arion banka 4F 2018