Fjárfestatengsl

Lykiltölur á fyrsta ársfjórðungi 2025

• Hagnaður sem tilheyrir hluthöfum Arion banka var 6,4 ma.kr. á fjórðungnum, samanborið við 4,4 ma.kr. á 1F 2024
• Arðsemi eiginfjár sem tilheyrir hluthöfum Arion banka var 12,8%, samanborið við 9,1% á 1F 2024
• Hagnaður á hlut var 4,59 krónur, samanborið við 3,07 krónur á 1F 2024
• Vaxtamunur á vaxtaberandi eignir var 3,1%, sami og 1F 2024
• Þóknanastarfsemin skilaði 4,5 mö.kr., samanborið við 3,4 ma.kr. á 1F 2024, og er þetta besti fjórðungur frá árinu 2022 þegar kemur að þóknunum
• Rekstur Varðar styrktist í samanburði við 1F 2024 en tap fjórðungsins nam 0,6 m.kr.
• Aðrar rekstrartekjur voru 3,3 ma.kr. sem skýrist að mestu af virðishækkun þróunareigna
• Kjarnatekjur, þ.e. hreinar vaxta-, þóknana- og tryggingatekjur (án rekstrarkostnaðar tryggingastarfseminnar), jukust um 15,4% í samanburði við 1F 2024
• Rekstrarkostnaður jókst um 0,7% samanborið við 1F árið 2024
• Virkt skatthlutfall var 32,2%
• Heildarkostnaður sem hlutfall af kjarnatekjum var 42,6%, samanborið við 48,4% á 1F 2024
• Kostnaðarhlutfallið var 34,7%, í samanburði við 45,3% á 1F 2024
• Efnahagsreikningur bankans stækkaði um 4,2% á fjórðungnum
• Lán til viðskiptavina jukust um 3,9 ma.kr. eða 0,3% á fjórðungnum
• Kaup eigin hlutabréfa og arðgreiðslur námu 19,1 ma.kr. á fjórðungnum
• Eiginfjárhlutfall bankans (CAR hlutfall) var 21,5% og hlutfall almenns eiginfjárþáttar 1 var 18,3% í lok mars. Hlutföllin taka tillit til óendurskoðaðs hagnaðar fjórðungsins að teknu tilliti til væntrar arðgreiðslu, sem nemur 50% af hagnaði í samræmi við arðgreiðslustefnu bankans. Eiginfjárhlutfall samkvæmt reglum Fjármálaeftirlits Seðlabanka Íslands var 21,2% í lok mars og hlutfall eiginfjárþáttar 1 17,9%. Eiginfjárhlutfall og hlutfall almenns eiginfjárþáttar 1 eru vel umfram kröfur sem settar eru fram í lögum og af Fjármálaeftirliti Seðlabanka Íslands. 

Benedikt Gíslason, bankastjóri Arion banka:

“Afkoma Arion banka á fyrsta ársfjórðungi er í samræmi við markmið þrátt fyrir ýmsar áskoranir í ytra umhverfi. Það var góður meðbyr á nær öllum sviðum starfseminnar en styrkur Arion samstæðunnar er ekki síst fjölbreytni þjónustunnar sem nær til flestallra sviða fjármála heimila, fyrirtækja og fjárfesta. Tekjusköpun er því mjög fjölbreytt sem hefur sveiflujafnandi áhrif og eykur áhættudreifingu í starfsemi okkar. Áfram er fjárhagslegur styrkur samstæðunnar mikill og eigin- og lausafjárstaða góð sem gerir okkur kleift að efla þjónustu okkar og takast á við margvíslegar áskoranir í ytra umhverfi.

Að þróa og efla þjónustu bankans hefur einmitt verið í forgangi undanfarna mánuði og ár og verður áfram. Það á jafnt við um stafrænu þjónustuleiðirnar okkar og þá persónulegu þjónustu sem við veitum viðskiptavinum okkar í útibúum og þjónustuveri. Við sjáum árangur þeirrar vinnu meðal annars í vinsældum Arion appsins. Á meðal nýjunga, sem við kynntum í upphafi árs, er nýtt fríðindakerfi fyrir viðskiptavini okkar sem er aðgengilegt í Arion appinu. Fríðindi viðskiptavina ráðast af umfangi þeirrar þjónustu sem þeir sækja til Arion samstæðunnar. Horft er til bankaþjónustu Arion banka, eins og innlána, greiðslukorta og íbúðalána, heimilistrygginga Varðar og viðskipta í sjóðum Stefnis. Einnig er horft til lífeyrismála og þá bæði þeirra valkosta sem Arion banki býður undir merkjum Lífeyrisauka og þess viðbótarlífeyris sem fólk hefur falið Frjálsa lífeyrissjóðnum að ávaxta, en sjóðurinn er í rekstri og eignastýringu hjá Arion banka. Við erum með metnaðarfull áform um frekari uppbyggingu kerfisins þar sem við umbunum viðskiptavinum okkar fyrir að velja okkur sem samstarfsaðila þegar kemur að fjármálum heimilisins.

Það náðist ánægjulegur áfangi á fjórðungnum þegar deiliskipulag Arnarlandsins í Garðabæ var samþykkt. Markmiðið með nýju deiliskipulagi er að skapa líflegt hverfi með íbúðum, þjónustu og atvinnustarfsemi. Hverfið verður fjölbreytt og er gert ráð fyrir um 450 íbúðum, nærþjónustu og starfsemi heilsuklasa þar sem áhersla er á fyrirtæki tengd heilsu og hátækni. Landey, fasteignaþróunarfélag í eigu Arion banka, á 51% í Arnarlandi og hefur þessi áfangi því jákvæð áhrif á uppgjör Arion samstæðunnar á fjórðungnum. Aðrar eignir Landeyjar eru lóðir og fasteignir á Blikastaðalandi í Mosfellsbæ og lóð og verksmiðjuhúsnæði í Helguvík. Markmið Landeyjar er að auka verðmæti eigna sinna með áframhaldandi þróun og uppbyggingu þessara svæða.”

Fundur / vefstreymi fyrir markaðsaðila 8. maí kl. 8:30

Fjárfestafundur fyrir markaðsaðila verður fimmtudaginn 8. maí klukkan 8:30 í Borgartúni 19 þar sem Benedikt Gíslason bankastjóri Arion banka mun kynna afkomu bankans og Erna Björg Sverrisdóttir aðalhagfræðingur Arion banka mun fara yfir stöðu efnahagslífsins. Fundurinn fer fram á ensku og verður einnig streymt beint.

Hægt verður að nálgast streymið á Lumiconnect og á fjárfestatengslavef bankans.

Þátttakendur sem fylgjast með rafrænt geta spurt spurninga á meðan á fundi stendur í gegnum spjallþráð á sömu síðu. Spurningum verður svarað að loknum kynningum.

Fjárhagsdagatal

Fjárhagsdagatal Arion banka er aðgengilegt á heimasíðu bankans.
 

Afkomutilkynning 1F 2025

Fjárfestakynning 1F 2025

Árshlutauppgjör 1F 2025